Mütəmadi olaraq sorağı beynəlxalq teatr festivallarından gələn Abdulla Şaiq adına Azərbaycan Dövlət Kukla Teatrının kollektivi növbəti səfərə hazırlaşır. Belə ki, teatrın repertuarında özünəməxsus yeri olan və qatıldığı bütün beynəlxalq teatr tədbirlərindən mükafatla qayıdan “Zəng” monotamaşası bu dəfə İranda nümayiş olunacaq.
Teatrın mətbuat xidmətindən bildirilib ki, İranın Məşhəd şəhərində reallaşacaq birinci “Jigi-Jigi” Beynəlxalq Performans və Sənət Festivalı aprelin 22-dən 30-dək davam edəcək.
Teatrlar, yaradıcı şəxslər, sənət adamları arasında mədəni əməkdaşlıq körpüsü yaratmaq, müxtəlif sənət cərəyanlarının bir səhnədə heç bir maneəsiz nümayişinə nail olmaq, beynəlxalq miqyasda teatr mübadiləsini təmin etmək məqsədilə baş tutacaq festivalda Azərbaycanla yanaşı 10-dan artıq ölkənin teatr təmsilçiləri iştirak edəcək.
Onu da qeyd edək ki, festivalda tamaşa nümayişləri ilə yanaşı, seminarlar və ustad dərslərinin təşkili də nəzərdə tutulub.
Mədəniyyət və Turizm Nazirliyinin dəstəyi ilə baş tutacaq səfərə fəxri qonaq qismində dəvət olunan teatrın direktoru, Əməkdar Mədəniyyət İşçisi, UNİMA Milli Mərkəzinin prezidenti Rəşad Əhmədzadə mərkəzin son 5 illik fəaliyyəti ilə bağlı festival iştirakçıları qarşısında çıxış edəcək.
Festivalda ölkəmizi təmsil edəcək tamaşanın ssenari müəllifi və quruluşçu rejissoru teatrın baş rejissoru Qurban Məsimov, quruluşçu rəssamı Rəvanə Yaqubovadır. Teatrın aparıcı aktyoru Rəhim Rəhimovun ifa etdiyi səhnə işi həm uşaqlar, həm də böyüklər üçün nəzərdə tutulub. Ailədə valideynlərə olan münasibətdən bəhs edən tamaşa izləyicilərdə valideynləri unutmamaq, onları diqqətdən kənarda saxlamamaq kimi müsbət keyfiyyətlər aşılayır.
azertag.az