Daşkənddəki ziyouz.uz portalı gənc tədqiqatçı Obid Şofiyevin Azərbaycan-özbək ədəbi əlaqələrinə dair geniş məqaləsini verib.
Özbək dilində yazılan materialda bildirilir ki, xalqlarımızın dili, mədəniyyəti, adət-ənənələri eynidir və tarixən xalqlarımızı qardaşlıq münasibətləri birləşdirib.
Məqalədə qeyd olunur ki, böyük Azərbaycan şairi Nizami Gəncəvinin əsərlərinin ilhamlanan özbək şairləri zaman-zaman müxtəlif əsərlər yaradıblar. Böyük özbək şairi Əlişir Nəvai Nizaminin “Xəmsə”sindən təsirlənərək türk dilində “Xəmsə” yazıb. Kütb Xarəzmi Nizaminin “Xosrov və Şirin” dastanını, Heydər Xarəzmi “Sirlər xəzinəsi” əsərini oxuduqdan sonra “Maxzan ul-Asror” poemasını yazıblar. Lütfi, Xarəzmi, Durbek, Qodoyi, Atoyi və digər ədiblərin əsərlərində də Nizami Gəncəvinin təsiri duyulmaqdadır.
Yazıda özbək ədəbiyyatının klassikinə çevrilmiş Maqsud Şeyxzadı haqqında da söhbət açılır. Qeyd edilir ki, Azərbaycandan Özbəkistana gələn şair burada məşhurlaşıb və qiymətli əsərlərini yaradıb.
Materialda keçmiş SSRİ dövründə və müstəqillik illərində şairlərimizin və yazıçılarımızın dostluğu haqqında da ətraflı söhbət açılır. Bildirilir ki, böyük Azərbaycan şairləri Nizami Gəncəvi, Füzuli və Nəsimi Özbəkistanda çox sevilir, onların əsərləri vaxtaşırı özbək dillində çap olunur.
azertag.az