Hacı Mahmud Əfəndi məscidi Qazax rayonunun Aslanbəyli kəndində yerləşib. Hicri-qəməri təqvimi ilə 1328-ci ildə (XX əsrin əvvəlləri) Həmid Əfəndi tərəfindən tikilmişdir. İç sahəsi 15x10 metrdir.

Hacı Mahmud Əfəndi məscidi 1938-ci ildən 1985-ci ilədək klub kimi istifadə olunmuşdur. 1990-cı ildə yerli sakinlər tərəfindən məscidin təmir-bərpa işlərinə başlanmışdır. Qeyd etmək lazımdır ki, məscidin vaxtilə minarəsi olmuşdur. Taxtadan olan minarə sonralar sökülüb dağıdılmışdır. Məscidin yeni ucaldılan minarəsinin hündürlüyü 18 metrdir.

Məscidin dam örtüyü şiferlə işlənmişdir. Giriş qapısının ön tərəfində eyvan (sahəsi 30 kv.metr) yerləşmişdir. Tavan taxtadan olub, düzbucaqlı formadadır. Minbər də taxtadandır və səkkizpilləlidir.

Azərbaycan Respublikası məscidlərinin ensiklopediyası