Karlar stansiyası Seyid Əhməd məscidi, Kürdəmir rayonunun Karlar stansiyasındadır. 1990-cı ildə tikilməyə başlanıb və 1994-cü ildə istifadəyə verilib. Həyətyanı sahəsi 1500 kv.metr, iç sahəsi 17x22 metrdir. Məscid mişar daşı ilə hörülüb. İki giriş qapısı var. Qapılar tağvari formadadır. Dam örtüyü və günbəzi ağ dəmir təbəqədəndir. Minbəri dəmirdəndir və beşpilləlidir. Döşəməsi və tavanı betondandır. İç divarları qum-sementlə suvanmışdır. Əsas ibadət zalı qadınlar və kişilər şöbəsinə ayrılmışdır. Məscidin döşəmədən tavana qədər hündürlüyü 4 metrdir. Yerdən günbəzədək hündürlüyü isə 8 metrdir. Məscid qoşa minarəyə malik olub, minarələrin hündürlüyü 14 metrdir. Dəmir borudan ucaldılmış bu minarələr tək şərəfəyə malikdir. Məscid yerli sakinlər Məşədi Sarıoğlan Tağıoğlu, Məşədi Xeyrulla Carıoğlu, Məşədi Gülabbas Mirabbasoğlu, Elman Məmmədhüseyn oğlu və mərhum Eynulla Baxşəlioğlunun təşəbbüsü ilə tikilib. Onu da qeyd edək ki, məscidin ustaları da məhz həmin şəxslər olublar. Hal-hazırda əslən şamaxılı olan Seyid Əhmədin adını daşıyır.

Azərbaycan Respublikası məscidlərinin ensiklopediyası