Azərbaycan Prezidenti İlham Əliyev 2007-ci ilin mayın 30-da Qazax şəhərinin mərkəzində - Heydər Əliyev prospektində xalq yazıçısı İsmayıl Şıxlının adını daşıyan parkın və ədibin abidəsinin açılışında iştirak etmişdir. Yazıçının heykəlinin məhz həmin yerdə qoyulmasının səbəbi: "Bağanis-Ayrım kəndi erməni vandalları tərəfindən vəhşicəsinə yandırılandan sonra Qazağın özündə elə adamlar oldu ki, artıq köç tədarükü gördülər. Onlar ailələrini təhlükəsiz yerlərə köçürmək istəyirdilər. Belə bir vəziyyətdə İsmayıl Şıxlı Qazağa gəldi. Bax, həmin bu heykəlin qoyulduğu yerdə stul qoyuldu və İsmayıl müəllim o stulda əyləşib heç nə demədən onu əhatəyə almış rayon sakinlərinin üzünə baxdı. O dilsiz baxışlar əslində çox şey dedi, öz dərsini verdi və şübhəsiz ki, köç fikrini də birdəfəlik yaddan çıxardı". Abidənin və parkın inşasına 2006-cı ildə başlanılmışdır. 1,2 hektar sahəni əhatə edən parkda görkəmli ədibin qranit postament üzərində 4,2 metr hündürlüyündə heykəli qoyulmuşdur.

http://www.muallim.edu.az/arxiv/2007/n20/resmi.html

http://www.anl.az/down/meqale/edebiyyat/edebiyyat_iyun2009/72391.htm