XX əsrin 50-ci illərində inşa edilmiş Binə Mədəniyyət Mərkəzi Heydər Əliyev Fondu tərəfindən əsaslı təmir olunub. Mərkəzdə yenidənqurma işlərinə 2007-ci ildə başlanılıb və 2010-cu ildə başa çatdırılıb.

2010-cu il dekabrın 28-də Heydər Əliyev Fondunun prezidenti Mehriban Əliyeva Xəzər rayonunun Binə qəsəbəsində Mədəniyyət Mərkəzinin açılış mərasimində iştirak edib.

İkimərtəbəli binada yerləşən mərkəz 2425 m² sahəni əhatə edir. Mərkəzin birinci mərtəbəsində şahmat, rəsm dərnəkləri fəaliyyət göstərir. Gələcəkdə xalçaçılıq, rəqs və digər dərnəklərin də işə başlaması nəzərdə tutulub.

Qəsəbədə yeni musiqi məktəbinə ehtiyac olduğu nəzərə alınaraq, mərkəzdə 24 saylı Uşaq Musiqi Məktəbinin fəaliyyətinə şərait yaradılıb. İkinci mərtəbədə yerləşən musiqi məktəbində 20 sinif, müəllimlər otağı və digər inzibati otaqlar vardır.

Mərkəzdə 14 minə yaxın kitabın saxlanıldığı ədəbiyyat fondu yaradılıb. 156 yerlik akt zalı da sakinlərin xidmətindədir.

Ətraf ərazi abadlaşdırılıb və yaşıllıq salınıb.