Mil düzündə, Beyləqan şəhər xarabalıqlarından 4 km şimal-qərbdə Qaratəpədə tədqiq edilmiş yaşayış yeri də kənd tipli yaşayış məskəninin qalıqlarıdır. Burada yaşayış məskəni dəmir dövrünün yaşayış yeri üzərində salınmışdır. Hündürlüyü 4 m, diametri 140 m olan bu təpədə qalınlığı 4,6 m olan, üç mədəni təbəqəyə ayrılan maddi mədəniyyət qalıqları yatımının varlığı arxeoloji qazıntılarla müəyyən olunmuşdur. Qalınlığı 80 sm-ə çatan, XI-XIII əsrin əvvəllərinə aid edilən üst mədəni təbəqədə çiy kərpicdən inşa olunmuş tikili qalıqları, ocaqlar, təndirlər, müxtəlif təsərrüfat quyuları aşkarlanıb tədqiq edilmişdir. Burada habelə üzərinə gil suvaq çəkilmiş təxminən 3x4 m ölçüdə döşəmə qalıqları da qeydə alınmışdır. Bu qalıqların çubuq hörmə evin qalıqları olduğu ehtimal olunur. Qazıntılar zamanı tapılmış maraqlı inşaat materiallarından qapının dabandaşını qeyd etmək olar. Yaşayış yerindən tapılmış arxeoloji materiallar o qədər də çox olmayıb əsasən şirli və şirsiz saxsı qablarla təmsil olunmuşdur.

Qaratəpədəki kənd tipli yaşayış yerində monqolların hücumu ilə əlaqədar həyat kəsilmiş, sakinlər onu tərk etmiş, sonradan maldar əhali bu təpədən qəbiristanlıq kimi istifadə etmişdir.