Siyəzən rayonun qədim tarixi, mədəniyyət abidələrindən biri də Gilgilçay səddidir. Azərbaycanda Sasanilər dövrünə aid müdəfiə səddi (III-VII əsrlər) Xəzər dənizindən başlayaraq Baba dağının ətəklərində qurtarır. 1931-1932 və 1963-1964-cü illərdə Çıraqqalayadək olan hissəsi təqribən 60 km. tədqiq olunmuşdur. Gilgilçay hövzəsindən dağın döşünə qədər 5 km-lik məsafədə divar göy kərpiçdən hörülmüşdür. Kolanı kəndi yaxınlığında divarların hündürlüyü 5-7 m-ə, bəzi yerlərdə isə 7-11 m-ə çatır. 30-35 m məsafədə bürc və ya qüllə ucaldılmışdır. Gilgilçay səddi 85-ci bürcdən cənub-qərbə dönür. Burada səddin eni aşağıda 30 km, yuxarıda isə 15 km-ə çatır. Çiy kərpiçdən tikilmiş 88-ci bürc Gilgilçay səddini 1 yarısının sonu hesab edilir. 74-88-ci bürclərin arasında qala olmuşdur. Gilgilçayın sol sahilində səddin qalınlığı nisbətən yaxşı saxlanılmışdır. Gilgilçay səddinin II hissəsi Çıraqqalaya yaxın qurtarır. Səddin III hissəsi Çıraqqalanın 600 metrliyindən başlayır və Təkyə kəndinə qədər uzanır. Sədd Şabran çayının dağ sahilində Çinarlar kəndinin şimal-qərbində qurtarır. Həmin ərazidə “Qalayeri” adlanan qədim şəhər xarabalıqları vardır. Gilgilçay səddinin IV hissəsi Qalayerindən Afurca kəndinə qədər istiqamətlənir. Ən böyük bürcün hündürlüyü 4,7 m eni isə 7,7 m-dir. Bürc və divarlar əsasən yonulmuş daşlardan hörülmüşdür. Səddin çox hissəsi dağılmışdır.

http://webcache.googleusercontent.com/search?q=cache:BJhkLuOwfQwJ:www.mct.gov.az/files/routes/others_1_1194511592.doc+%C5%9Eabran+qalas%C4%B1&cd=12&hl=ru&ct=clnk&gl=az&client=firefox