Azərbaycanın Xorvatiyadakı səfirliyinin təşkilatçılığı və Mədəniyyət Nazirliyinin dəstəyi ilə Xorvatiyanın Osiyek-Baranya vilayətində Beynəlxalq İpək Yolu Festivalında Dövlət Mahnı və Rəqs Ansamblımızın 11 nəfərlik rəqs qrupu iştirak edib.
Tədbirin əsas məqsədi müxtəlif xalqlar arasında dialoqun inkişafı və Böyük İpək Yolunun keçdiyi ölkələrdə formalaşmış unikal mədəniyyətlərin təbliğ edilməsindən ibarət olub. Festival çərçivəsində “İpək Yolu” ölkələrinin bədii filmlərinin nümayişi, eləcə də milli musiqi, rəqs, mətbəx və digər mədəni tədbirlər keçirilib.
Bu il keçirilən İpək Yolu Festivalında Azərbaycan incəsənət nümayəndələri ilə yanaşı Türkiyə, Rusiya, Çin, Qazaxıstan, İran, Monqolustan və Hindistandan sənətçilər qatılıblar.
Azərbaycan Dövlət Mahnı və Rəqs Ansamblının rəqs qrupu təşkil edilmiş konsert proqramlarında müxtəlif milli rəqslər təqdim ediblər və xorvat tamaşaçıları tərəfindən maraq və rəğbətlə qarşılanıblar.
Festival çərçivəsində Xorvatiyanın Turizm Nazirliyinin Dövlət katibi, Osiyek-Baranya vilayətinin rəhbərliyi və iştirakçı dövlətlərin səfirlərinin iştirakı ilə Osiyek Universitetində İpək Yolu ölkələrində turizm məsələlərinə həsr olunan dəyirmi masa keçirib. Tədbirdə ölkəmizin Xorvatiyadakı səfiri Fəxrəddin Qurbanov çıxış edərək Azərbaycanda son illər ərzində turizmin inkişafi üçün yaradılmış infrastruktur, turistlərin ölkəmizə gəlişinin asanlaşdırılması məqsədilə qanunvericilik bazasının təkmilləşdirilməsi istiqamətində mühüm addımların atıldığını diqqətə çatdırıb.
Qeyd edək ki, 2018-ci ildə sözügedən festival Xorvatiyanın Zadar şəhərində keçirilib və Azərbaycanın Xorvatiyadakı səfirliyi bu festivalda “Əbədi ezamiyyət” filmi ilə iştirak edib.
azertag.az