Fevralın 22-də Azərbaycanda Atatürk Mərkəzində “Cəmiyyətə həsr olunmuş illər: Akkan Suver” kitabının təqdimatı keçirilib. Bu yeni nəşr Engin Köklüçinarın Mərmərə Qrupu Strateji və Sosial Araşdırmalar Vəqfinin sədri, professor Akkan Suver haqqında yazdığı “Sivil topluma adanmış yıllar” kitabının Azərbaycan dilinə tərcümə olunmuş variantıdır.
Kitabı Azərbaycan dilinə Atatürk Mərkəzinin əməkdaşı Afət Mamayeva çevirib.
Tədbirdə əvvəlcə Xocalı soyqırımının qurbanlarının xatirəsi bir dəqiqəlik sükutla yad edilib.
Çıxış edən Akkan Suver 20 Yanvar faciəsi, Xocalı soyqırımı barədə gəncləri məlumatlandırmağın vacibliyini vurğulayıb. Haqqında yazılmış kitab barədə danışan A.Suver deyib ki, bu onunla bağlı Azərbaycanda çap olunmuş üçüncü nəşrdir.
Akkan Suverin Azərbaycana bağlı insan olduğunu söyləyən Azərbaycanda Atatürk Mərkəzinin müdiri, AMEA-nın müxbir üzvü Nizami Cəfərov bildirib ki, o, ölkəmizin taleyi ilə bağlı işlərə həmişə reaksiya verib.
Diqqətə çatdırılıb ki, nəfis şəkildə çap olunan kitabda daha çox Azərbaycanla bağlı fotolara üstünlük verilib.
Nizami Cəfərov qeyd edib ki, Akkan Suverin tərcümeyi-halında, fəaliyyətində tarixi şəxsiyyətlərin izləri var. Engin Köklüçinarın bu kitabında Akkan Suverin xüsusilə iki böyük şəxsiyyətlə olan münasibəti, Azərbaycanda Heydər Əliyev, Türkiyədə isə Süleyman Dəmirəlin onunla bağlı düşüncələrinə yer verilib.
Kitab haqqında məlumat verən E.Köklüçinar deyib ki, nəşrdə Akkan Suverin 1998-2016-cı illərdə Mərmərə Qrupu Strateji və Sosial Araşdırmalar Vəqfindəki 19 illik fəaliyyəti əks olunub. Kitabda, həmçinin 31 ildir səmərəli fəaliyyət göstərən Mərmərə Qrupu Strateji və Sosial Araşdırmalar Vəqfinin qazandığı nailiyyətlərdən də bəhs edilir.
Kitabın tərcüməçisi Afət Mamayeva deyib ki, bu onun Akkan Suverlə bağlı tərcümə etdiyi ikinci kitabdır.
Xalq Yazıçısı Çingiz Abdullayev, Dini Qurumlarla İş üzrə Dövlət Komitəsi sədrinin birinci müavini Səyyad Aran və digər çıxış edənlər Akkan Suverin Azərbaycana bağlı insan olduğunu qeyd edərək bildiriblər ki, o, haqqında kitab yazılmağa layiq şəxsiyyətlərdəndir.
azertag.az